Pétur R. Pétursson

petur@billinn.is

Rafmögnuð Kona.

Hyundai Kona hefur verið á markaðnum frá því í fyrra og hefur vakið verðskuldaða athygli.  Kona kemur nú í fyrsta sinn í rafmagnaðri útfærslu en hefur verið boðinn í bensín og dísel útgáfu auk þess sem hægt hefur verið að fá bílinn meða aldrifi. Hyundai teflir fram Konu í samkeppninni um litla sportjeppa og frændgarðurinn fer stækkandi.  Nefna má Kia Niro, VW T-Roc og Renault Captur sem ættingja Hyundai Kona en allt eru þetta bílar sem fást í fjölbreyttum útgáfum.

LED ljósin setja skemmtilega svip á bílinn og grillið sver sig í ætt rafmagnsbíla.

Minnir einna helst á flugtak.

Það fyrsta sem kom upp í hugann er maður steig á inngjöfina var þegar maður situr í þotu og hún er að hefja sig til flugs.  Aflið skilar sér beint til hjólanna og togið virkar strax.  Hrifningin er því ósvikin og brosviprurnar entust alveg í nokkra kílómetra þegar gefið var inn á Reykjanesbrautinni, svo gaman er að aka rafdrifinni Konu.  Vélin í þessum bíl er að skila um 200 hestöflum eða að hámarki 150kw.  Hröðunin er 7.6 sekúndur og uppgefinn hámarkshraði 167 kílómetrar á klukkustund.

Rafmagnsmótor sem skilar um 200 hestöflum og hröðun um 7,6 sekúndur í 100 kílómetra hraða.

Raunhæfur kostur?

Það er engum blöðum um það að fletta að rafdrifnir bílar eru það sem koma skal.  En er þessi tækni alveg tilbúin?  Hyundai Kona er með rafmagnsendingu upp í allt að 482 kílómetrum við bestu aðstæður.  Sú kílómetratala er gefin upp af framleiðanda. Rafhlaðan er 64kw Lithium-ion Polymer.  Í raunveruleikanum er bíllinn þó aldrei að ná að fara þá vegalengd enda tala sem reiknuð er út á rannsóknarstofu.  Samt sem áður er Hyundai Kona með eina mestu drægni af sínum kollegum. Við prófun bílsins naut undirritaður þess að aka honum heilan dag, bæði í langkeyrslu og í bæjarsnatti. Hitastigið var undir fimm gráðum og vægt áætlað er að vegalengdin hafi verið um 300 kílómetrar á reynsluaksturstímanum.  Tvisvar fram og til baka til Keflavíkur og talsverður akstur í umferð á annatíma og þá var 20% af hleðslu eftir á rafhlöðunni.  Hraðhleðsla tekur um 54 mínútur en heimahleðsla í gegnum kapal sem fylgir bílnum tekur tæpar 10 klukkustundir.

Hyundai Kona EV er glæsilegur bíll sem gott er að keyra.

Gott að keyra

Það fer vel um mann í farþegarýminu.  Sætin eru þægileg og halda vel utan um mann og bakið sérstaklega þó svo að setan sé í styttri kantinum eins og í fleiri gerðum Hyundai bíla.  Bæði bílstjóra- og farþegasætið eru rafdrifin og hægt að hækka og lækka og stilla hallann á setunni ein-nig.  Stýrið er hlaðið tökkum til að stytta leiðina að afþreyingarefni, bluetooth símatengingu og aksturstölvu bílsins.  Miðjustokkurinn er breiður og mikll án þess þó að skemma fyrir fótaplássi frammí í bílnum.  Þó er geymsla undir miðjustokknum með 12v tengi og USB tengi sem er á frekar skrítnum stað upp á að komast auðveldlega að.  Viðmót stafræna mælaborðsins breytist svo eftir völdum akstursham.  Hægt er að velja um eco, comfort og sport aksturstillingar.  Í sport stillingunni öskrar bíllinn áfram eins og antílópa með ljón á eftir sér.

Sérlega þægilegt er að ganga um bílinn og hæðin þannig gott er að setjast inn og stíga út.

Stútfullur af tækni

Skynvædd hraðastilling og bíllinn heldur bili á milli bíla, skynvædd há ljós skipta úr háu yfir í lágu við mætingu bíls, akreinavarar fylgjast með staðsetningu bíls á akrein í akstri, blindhor-naviðvörun, árekstarvarar að framan og aftan, bakkmyndavél, þráðlaus símahleðsla, 2 USB tengi og AUX tengi og fullkomin Kroll hljómtæki.  Bíllinn er með 8 tommu snertiskjá sem afar auðvelt er að nota.  Stafræn miðstöð með loftkælingu og GPS staðsetningarkerfi.  Bíllinn tekur við raddskipunum á ensku og td. hægt að óska eftir því að hann hringi í númer sem er í tengiliðaskrá símans þíns.  Apple Car Play og Android Auto2. Lyklalaust aðgengi. Head-up display.

Breiður miðjustokkurinn hefur ekki áhrif á fótapláss og 8 tommu upplýsingaskjárinn er vel staðsettur.

Góður valkostur

Hyundai Kona er huggulegur og notadrjúgur bíll í flokki minni jepplinga. Ef verið er að spá í bíl sem mest er notaður í borgar- og bæjarumhverfi og um venjulega notkun er að ræða er Kona fínn kostur.  Vel fer um fjóra fullorðna í bílnum en skottpláss er frekar lítið en það á við um flesta bíla í þessum flokki.  Verðið kemur ekki á óvart enda um rafmagnsbíla að ræða og verð þeirra í hærri kantinum þó svo að ívilnun á innflutningsgjöldum sé enn í gildi.

Skottpláss er í minni kantinum eins og þekkist í þessum flokki bíla.

Verð: 5.190.000

Vél: Rafmagn / Permanent Magnet Synchronous Motor

Hestöfl: 150 kW / 204 hestöfl

Newtonmetrar: 395 Nm

0-100 k á klst: 7,6 sek.

Hámarkshraði: 167 km

CO2: 0 g/km

Drægni: 482 km (skv. upplýsingum framleiðanda)

Eyðsla bl. ak: 14,3 kWh / 100 km

Ljósmyndir: Tryggvi Þormóðsson

Hér kemur auglýsing

Einhver linkur