Það gæti farið svo að BMW láti ekki staðar numið með núverandi 8-seríu og komi einnig með enn stærri og flottari bíla í nýrri „9-seríu“!

Þar með myndi glæsibílar á borð við Mercedes-Maybach S600 fá verðuga samkeppni frá BMW. Segja má að nú þegar sé til staðar svona samkeppni með 7-línunni frá BMW og nýi Gran Coupe-bíllinn í 8-seríunni gæti verið vísbending um að þetta verði að veruleika.

Haft hefur verið eftir Adrian van Hooydonk, aðalhönnuði BMW í Autocar, að væntanlega stoppi þeir ekki hér, og átti þá við 8-seríuna. Það er okkar hlutverk að fá fleiri hugmyndir sem verksmiðjurnar geta framleitt, annað væri hreinlega slæmt, segir hann. Teymið mitt og ég erum að horfa til ársins 2021 og síðar – allt fram til 2030. Við eigum nóg af hugmyndum.

Talið er að þessi nýja „9-sería“ muni fá margt í arf frá 7- og 8-seríu BMW, bæði hvað varðar útlit og vélbúnað, en myndirnar sem hér fylgja eru af BMW Gran Coupe í seríu 8.