Allir Hybridbílar kolefnisjafnaðir

Toyota á Íslandi og Kolviður hafa undirritað samning um kolefnisjöfnun allra nýrra Hybridbíla frá Toyota og Lexus sem seldir eru frá 1. janúar 2019.

Samkvæmt reiknivél sem sjá má á www.kolvidur.is þarf að planta 17 trjám til að kolefnisjafna akstur Hybridbíls sem eyðir 5l á 100 km í eitt ár. Í samningnum er miðað við 15.000 km akstur hvers bíls á ári. Toyota á Íslandi mun greiða fyrir plöntun trjánna.

„Toyota hefur sett sér það markmið að frá 2050 verði enginn útblástur frá nýjum bílum, hvorki frá framleiðslu þeirra né notkun. Þangað til verðum við að brúa bilið með einhverjum hætti. Margar leiðir eru færar en við höfum ákveðið að ganga til samstarfs við Kolvið um að gera akstur Hybridbíla sem við seljum kolefnishlutlausan“, segir Úlfar Steindórsson, forstjóri Toyota á Íslandi.

„Við fögnum þessu skrefi sem Toyota á Íslandi hefur ákveðið að taka. Það er ekki dýrt að kolefnisjafna akstur bíla og ætti að vera á allra færi því kolefnisjöfnun í eitt ár kostar minna en að fylla tankinn einu sinni“ segir Reynir Kristinsson, stjórnarformaður Kolviðar.