|
|
|
|
|
|
 |
|
|
|
|
|
Þegar afturendi leitar út úr beygju. |
|
|
|
|
 |
|
|
|
|
|
 |
|
| :: greinar |
|
| Thursday, 14. júlí 2005 - 15:01 |
|
Bílainnflutningur hefur tekið mikinn kipp á þessu ári og ef fram fer sem horfir eru líkur á að nýtt met verði slegið á þessu ári. Fyrstu 6 mánuði ársins voru fluttir inn 9.686 fólksbílar og jeppar og 1.218 atvinnubílar. Samanlagt er því búið að flytja inn 10.904 ný ökutæki. Á sama tíma í fyrra var búið að flytja inn 7205 ný ökutæki sem er aukning um 51,3%.
Venjan er sú að um 55% af innflutningnum skilar sér inn á fyrstu 6 mánuðum ársins og 45% á síðari árshelmingi. Miðað við að það gangi eftir má búast við að fluttir verði inn 19.800 bílar allt árið 2005. Það yrði nýtt met, en fyrra met er frá 1987 þegar fluttir voru ríflega 18.469 ný ökutæki til Íslands.
Egill Jóhannsson, framkvæmdastjóri hjá Brimborg, segir að flestir búist við að heldur dragi úr innflutningi þegar líður á árið. Hann segist upphaflega hafa reiknað með að niðurstöðutalan yrði á bilinu 16.000 til 16.500 bílar, en reiknar nú með að salan fari að nálgast 17.500 bíla í lok þessa árs. Starfslið Brimborgar telur nú um 140 manns.
64% söluaukning
"Á sama tíma í fyrra vorum við búnir að afhenda 880 bíla í öllum okkar merkjum, en núna höfum við afhent 1.440 bíla. Þetta er því nærri 64% aukning. Markaðurinn hefur á sama tíma vaxið um 51,3% þannig að við erum að auka okkar hlutdeild. Við vorum með 12,2% hlutdeild fyrstu sex mánuðina í fyrra en erum með 13,2% núna."
Stefnt að 20% hlutdeild
Egill segir að markvisst sé stefnt að því að auka markaðshlutdeild Brimborgar í bílasölu á Íslandi. Hún var 6% árið 2001 og allt árið í fyrra um 13%. Markmiðið er að ná 15% markaðshlutdeild á þessu ári. Hann segir alls ekki óraunhæft að ætla að Brimborg nái 20% markaðshlutdeild á næsta ári. Þessi hlutdeild er reiknuð út frá heildarmarkaði í sölu bíla. Ef sala á bílum til bílaleiga sé hins vegar dregin frá þá telur Egill að Brimborg sé þegar farin að nálgast 20% markaðshlutdeild.
Methagnaður annað árið í röð
@mm:Egill segir ekki hægt að kvarta yfir afkomu Brimborgar um þessar mundir. Fyrstu 6 mánuði þessa árs sé hagnaður verulega meiri en allt árið í fyrra sem þó var metár.
Velta Brimborgar hefur aukist mjög mikið á undanförnum árum. Árið 2002 var hún um 3 milljarðar króna í kjölfar mikils samdráttar í bílasölu á Íslandi. Árið 2003 fór veltan í 5 milljarða króna og í 7,5 milljarða árið 2004. Í ár eru líkur á að veltan fari yfir 10 milljarða króna, en áætlun fyrirtækisins gerði ráð fyrir 8 milljarða króa veltu. Egill segir að þó reiknað sé með samdrætti í bílasölu hér á landi á næsta ári þá geri hann samt ráð fyrir að velta Brimborgar fari í 12 milljarða króna.
Brimborg hefur keypt lóð í Kópavogi þar sem hugmyndin er að auka við starfsemi fyrirtækisins. Þá er fyrirtækið búið að kaupa húsnæði að Bíldshöfða 8 við hliðina á aðalstöðvum fyrirtækisins. Þar er verið að opna sýningarsali og verkstæði. Þá hefur fyrirtækið fengið stækkun á lóð sinni við Bíldshöfða til suðurs til að stækka verkstæði fyrirtækisins. Á næstu 12 til 18 mánuðum er ráðagert að auka verkstæðis- og sýningarrými um 1000 til 1.500 fermetra.
--Nú er Brimborg með umboð fyrir Ford, Lincoln, Volvo, Citroën og Daihatsu, en hvert er ykkar sterkasta merki?
"Í einingum talið er Ford nú okkar sterkasta merki og hefur vaxið á 10 árum úr 1% í 10% markaðshlutdeild. Þar erum við nú með 940 bíla selda. Það hafa þó öll okkar merki verið að vaxa nema Daihatsu sem við höfum eiginlega ekki flutt inn í þrjú eða fjögur ár. Vörulína Daihatsu hefur undanfarin misseri ekki fylgt þróun í Evrópu og á Íslandi og því hefur salan í Evrópu stórminnkað þó fyrirtækið sé fjórði stærsti bílaframleiðandinn í Japan. Þó eru teikn á lofti um breytingar á vörublínu fyrirtækisins og líklegt að hagur þess fari að vænkast hér á landi sem og í Evrópu. Mikil söluaukning hefur verið í Citroën frá því Brimborg endurkynnti það merki. Citroën hefur t.d. verið mjög sterkur í smábílum sem seljast mjög vel hér eins og C3 bíllinn og nýjasta afurðin, C4 hefur farið gríðarlega vel af stað.
Þá er Volvo með 87% aukningu og hefur vaxið hraðar en markaðurinn undanfarin ár. Við erum búnir að selja 240 Volvobíla á móti en vorum með 127 á sama tíma í fyrra. Mér sýnist að Volvo sé nú með langmestu hlutdeild af dísilvélum í fólksbílum hér á landi. Það helgast að einhverju leyti af því að Volvo getur boðið bæði beinskipta og sjálfskipta bíla með dísilvélum. Ísland sker sig frá öðrum Evrópulöndum hvað varðar hlutfall sjálfskiptra bíla í heildarsölunni. Hér er hlutfallið mjög hátt. Ef við tökum bíla eins og Volvo Cross Country eða S-80 þá er 100% af þeirri sölu í sjálfskiptum bílum."
Auk góðrar fólksbílasölu Volvo þá segir Egill að mikið sé að gera í sölu vinnuvéla og vörubíla frá Volvo. Nú stefni í árið 2005 verði stærsta ár í sölu vinnuvéla hjá fyrirtækinu í kjölfar metárs í fyrra.
Í heild reiknar Brimborg með að afhenda um 2.300 nýja bíla, vörubíla og vinnuvélar á þessu ári á móti 1.780 á síðasta ári og um 600 árið 2002.
Notaðir bílar seljast líka vel
Þrátt fyrir 64% meiri sölu á nýjum bílum þá hefur lager notaðra uppítökubíla hjá Brimborg ekki aukist. Hann hefur að sögn Egils frekar minnkað ef eitthvað er. Árið 2002 voru 270 notaðir bílar á lager en nú eru þeir um 200. Þar er að skila sér sölukerfi sem Brimborg innleiddi frá Volvo í Bretlandi fyrir 6 árum. Var þá gjörbreytt vinnuaðferðum við uppítöku, sölu og birgðastýringu hjá fyrirtækinu.
Lykillinn er að mati Egils að sett voru þau markmið að enginn bíll væri lengur á lager en í 90 daga. Þetta hafi algjörlega gengið eftir þó það hafi tekið tíma að ná því markmiði. Í fyrra náðist þetta markmið alla mánuði nema tvo. Í lok júní á þessu ári, sem var stærsti mánuðurinn í sögu fyrirtækisins í afhendingu nýrra bíla, þá var elsti notaði bíllinn á lager 84 daga gamall. Þá segir Egill að þessi breyting hafi líka gert það að verkum að fyrirtækið sé að ná hagnaði út úr sölu notaðra bíla ólíkt því sem áður var. Hefur mikill lager notaðra bíla reyndar leikið mörg bílaumboð grátt í gegnum tíðina vegna mikils fjármagnskostnaðar og fjárbindingar.
Dísilbílasalan eykst hægt
Egill segir að sala dísilbíla hafi þó farið hægar af stað en menn vonuðust til. Dísilvélarnar séu orðnar mjög skemmtilegar og kraftmeiri en bensínvélar með sama rúmtaki. Almenningur virðist einkum hafa orðið fyrir vonbrigðum með hversu hátt olíugjaldið varð. Hlutfall seldra dísilbíla sé samt heldur að aukast, enda eyði dísilbílar um 30% minna eldsneyti þó þeir kosti að vísu um 10% meira en bensínbílar.
Er meira selt af dýrum bílum en áður?
"Já, mér sýnist að það sé frekar meiri vöxtur í sölu dýrari bíla en áður. Það fylgir auðvitað góðu árferði. Maður hefur á tilfinningunni að þróunin sé svipuð og 1987 og að menn séu að bæta við öðrum og þriðja bíl á heimili.
Reyndar voru aðeins aðrar ástæður fyrir vextinum 1987. Þá spiluðu ýmsir þættir saman. Það voru lækkuð vörugjöld á bílum 1986 þegar menn voru að reyna að ráða niðurlögum verðbólgunnar þannig að bílar lækkuðu um nær 30%. Á sama tíma var mjög gott árferði og 1986 og 1987 voru mjög sterk ár í efnahagsmálum þjóðarinnar. Á þessum tíma voru vextir líka gefnir frjálsir þannig að til urðu fyrirtæki eins og Glitnir og Lýsing sem komu með nýjungar í fjármögnun bíla. Þessu til viðbótar var árið 1987 skattlaust.
Í dag eru forsendurnar dálítið öðruvísi. Efnahagslífið er mjög sterkt og endurnýjunarþörf er búin að vera mikil eftir léleg ár í bílasölu 2001 og 2002. Þá er enn meira úrval á lánamarkaði í dag og krónan er mjög sterk. Vegna þess hefur raunverð bíla lækkað verulega þó menn sjái það kannski ekki á verðlistunum."
Raunverð bíla hefur lækkað
Egill segir að lækkun á bílverðinu komi m.a. fram í því að seljendur séu að setja meiri staðalbúnað í bílana án þess að hækka þá í verði. Framleiðendur hækki bíla sína um 2-3% á ári vegna verðbólgu, en sú hækkun er ekki látin skila sér út í verðlagið hér vegna styrkleika krónunnar. Þá komi verðlækkun oft fram hjá umboðunum í því formi að gefinn sé meiri afsláttur frá listaverði en oft áður.
Ástæða þess að listaverðið sé ekki hreinlega lækkað til að sýna raunverulegt söluverð segir Egill að sé m.a. sú að það þyki ekki gott að hringla mikið með verðið á bílunum frá mánuði til mánaðar sem gæti þá haft neikvæð áhrif á endursöluverð bílanna.
Þó krónan hafi styrkst almennt gagnvart öllum gjaldmiðlum, þá er nokkuð mismunandi hversu vægið hefur breyst t.d. gagnvart jeni, evru og dollar. Þetta sýnir sig t.d. vel í óvenjumiklum innflutningi á bílum frá Bandaríkjunum.
"Krónan hefur líka verið að styrkjast gagnvart sænsku krónunni. Þess vegna erum við t.d. með 5% afslátt af verði allra Volvobíla. Í Ameríkubílunum höfum við verið að fara alveg upp í 9 til 10% afslátt auk þess sem við höfum líka lækkað verðlistaverðið. Við höfum því látið raunverulegt söluverð algjörlega fylgja gengissveiflunum."
--Þetta hefur þá væntanlega haft mikil áhrif á sölu á amerískum bílum eins og Ford sem Brimborg er með umboð fyrir?
"Jú, það er raunin. Ég get nefnt sem dæmi að árið 2002 fluttum við inn 9 ameríska bíla og 54 árið 2003. Í fyrra voru þeir rétt tæplega 500. Við förum nálægt því að flytja inn 700 bíla á þessu ári bara frá Ameríku. Þarna er um að ræða stóra pallbíla eins og Ford 150 og 350. Ford Escape sportjeppinn er samt langvinsælastur, en þetta er sportjeppi í millistærðarflokki sem er að keppa við bíla eins og Toyota RAV og Honda CRV. Fordinn er þó allur heldur rýmri og með aðeins stærri vél. Þá er Ford Explorer jeppinn að seljast mjög vel núna. Í Evrópudeildinni er það einkum Ford Focus sem gengur mjög vel að selja og er hann einn sterkasti bíllinn í þeim flokki á markaðnum."
Öfugþróun á Íslandi
Þú bendir á mikil kaup Íslendinga á kaupum á stórum amerískum bílum. Er þetta samt ekki alveg öfugt við það sem hefur verið að gerast í bílasölu í Bandaríkjunum og Evrópu?
"Það er rétt. Í Bandaríkjunum hefur verið verulegur samdráttur í sölu á stórum pallbílum og stórum jeppum. Menn vilja einkum rekja það til hækkunar á eldsneytisverði. Við erum kannski svo ónæm fyrir háu eldsneytisverði að það skiptir okkur kannski engu máli. Annars getur maður eiginlega ekki skýrt þetta því mesti vöxturinn erlendis er í sölu á smærri bílum. Markaður fyrir smábíla hér á landi hefur í gegnum tíðina verið um 12% af heildarsölunni en ég gæti trúað að hlutdeild þeirra í heildarsölunni sé nú komin niður í 9%. Þar af eru bílaleigubílar stór hluti svo almenni markaðurinn er kannski komin niður í 5 til 7%. Þróunin hér er því dálítið öfugsnúin.
Sem dæmi um þróunina erlendis þá voru Toyota og PSA group (Citroën og Peugeot) að gangsetja sameiginlega verksmiðju um framleiðslu á smábíl í Tékklandi fyrir Evrópumarkað. Allar tegundirnar verða í grunnin eins, ýmist með bensínvélar frá Toyota eða dísilvélar frá Citroën. Úr þessari framleiðslu er Citroën að koma með smábílinn C1 á markað í Evrópu, en við reiknum ekki með að fá hann til okkar fyrr en í lok þessa árs.
Talsverð þörf fyrir stóra bíla
Þrátt fyrir þessa þróun erlendis má ekki gleyma því að við höfum talsverða þörf fyrir stærri og öflugri bíla. Vegakerfið er verra hjá okkur en úti í Evrópu og við höfum snjó og annað til að takast á við. Við þurfum því að einhverju leyti á þessum bílum að halda þó deila megi um hvort við þurfum svona mikið af þeim."
Egill nefnir í þessu sambandi mikinn hestaáhuga Íslendinga. Fram til þessa hafi hestamenn gjarnan keypt minni japanska pallbíla til að nota í þetta sport. Þeir sé samt full litlir til að ráða við stórar hestakerrur og vagna. Fyrir þennan kaupendahóp séu stóri amerískir pallbílar mjög góð lausn og salan á minni pallbílum hefur því fallið úr 600 til 800 bílum á ári niður í um 150 bíla. Stærri bílarnir henta betur við óblíðar aðstæður. Þeir eru öflugir og vélarnar með mikinn togkraft og dráttargetu. Auk þess eru þeir á mjög góðu verði.
Tollareglur hluti af skýringunni
Hluti af skýringunni á svo mikilli sölu stórra amerískra bíla má trúlega líka rekja til tollareglan hér á landi. Á meðan fólksbílar og jeppar bera 30% eða 45% vörugjald eftir vélastærð, þá eru pallbílar aðeins með 13% vörugjald. Þá má nefna að stórir pallbílar sem talsvert hafa verið fluttir inn og eru yfir 5 tonn í heildarþyngd, flokkast sem vörubílar og bera ekkert vörugjald. Þetta hefur án efa freistað margra þó erfitt sé að rökstyðja notagildi slíkra bíla fyrir venjulegar fjölskyldur.
Egill telur líklegt að ef það fer að draga saman í efnahag Íslendinga þá megi búast við því að mikill fjöldi stórra bíla komi inn á endursölumarkaðinn. Einkum frá þeim sem eru nær eingöngu að nota þessa bíla í borgarakstri. Það gæti þýtt að þeir verði erfiðir í sölu.
Nú er Brimborg ekki bara að flytja inn stóra pallbíla og Jeppa frá Bandaríkjunum, hvað með Ford Mustang?
"Við höfum bara átt í vandræðum með að fá nógu mikið af þeim bílum. Hann selst það mikið í Bandaríkjunum og sá markaður hefur forgang. Við erum þó búnir að taka pantanir á um 20 bílum og fáum ekki nema um 3 til 4 bíla til afhendingar á mánuði. Mustanginn er einhver best lukkaða framleiðsla Ford í áratugi. Þeir eru að selja um 15 til 20 þúsund bíla af þessari gerð í mánuði. Talað er um þetta sem toppinn í amerískri bílaframleiðslu sem sýni að þeir geti vel keppt við bílaframleiðendur í Asíu," segir Egill Jóhannsson.
|
|
|
 |
|
|
|
